Atmaja hoon main.. yeh meri kahani hai,

Kya kya hua mere saath..wo har baat batani hai,

Paida hui toh diya devi ka darja,

Beti hui hai? Ab hoga karza hi karza.

Kathor vachan har pal sahe…

Aansu meri aankh se har pal bahe.

Ik mod aaya zindagi me jo kabhi nahi tha socha…..bahut cheekhi chillayi jab uss janwar ne tha nocha.

Dhundh rahi thi Maa ka aanchal,

Wo aansu mere pochengi…..kabhi na socha tha ki wahi mujhe kosegi.

Dil ki gehraiyon me bas gaye mere jazbaat sabhi… unka chhedna dukh deta tha,

Ab gharwalo ki laadli main nahi

Unka ladla beta tha.

Kacchi umar me saath bana ghar ka chulha chauka,

Umeed kho chuki thi main ki milega kabhi khud ko saabit karne ka mauka.

Phir aaya ek din jab saath chhod gaye mere sapne,

apne bane gair……par gair ho gaye apne.

Ab kar liya nishchay dridh nahi sahungi apmaan,

Har baat ka Ab dungi jawab chahe bahishkaar kar de ye samaj.

Atmaja hoon main…. yeh meri kahani hai,

Kya kya hua mere saath…wo har baat batani hai.