Janam liya ek hi kokh se

To ye bhed bhav kyu hai?

Beta ghar ka raja 

Beti sar ka bojh kyu hai?

Beta adhi raat ko aaye ghar

Wo aam baat kyu hai?

Beti ko bahar Jane par

sau pabandi kyu hai?

Beta kare sharminda baar baar  

fir bhi wo dulara kyu hai?

Beti rakhe maryada ka 

khyaal yahi riwayat kyu hai?

 Bani kisi ke ghar ka maan par

lajjit huyi har baar kyu hai? 

Suhaag khaye taaza pakwaan,

Uske hisse rukhi roti-daal kyu hai?

Aayi ghadi jab matritav ki

beta hi ho ye ashirwaad kyu hai?

Jo na de payi santaan hi

to baanjh hone ka abhishaap kyu hai?

Budhape ka sahara beta banega

aisa vichaar kyu hai?

Beti ne ki umar bhar seva to 

chita ko agni dene ka haqdaar beta kyu hai?